巷仔口的台語

主持人 :
節目介紹 :

播出時段:106年9月4日起 週一至週五12:20~12:25

台灣閩南語教學單元

節目內容以教育部閩南語常用詞辭典俗諺為架構,搭配時事或故事,以輕鬆的題材為主,用對話方式進行閩南語教學,介紹有趣的台灣閩南語。

邀訪來賓:無

台灣俗語會當用「一日掠魚,三日曝網」、「一工拍鳥,三工挽毛」或者是「一日討海,三日曝網」來佮『一曝十寒』相對應,這種貧惰做代誌的人已經足害,若是拄著「骨力食,貧惰做」的人就閣較悽慘。「貧惰人,講有話」,代誌貧惰做,藉口顛倒揣一大堆,共工課攏捒予別人,一喙掛雙舌,無影話講甲規大篇。講著就厭氣,雖然平常時仔遮的人代誌無欲做,毋過若是欲食物件,規个人就精神、氣力攏齊來,用「食飯若武松拍虎,作穡若桃花過渡」這句俗語,就是上好的形容。

邀訪來賓:無

俗語講:「會做新婦兩頭瞞,袂曉做的兩頭湠」,瞞是瞞騙;湠是四界傳,兩頭就是大家官佮後頭厝這兩爿。仝一件代誌,仝口灶的人就無一定有相仝的看法,外口的人更加免講,所以做新婦的人,「入人門,順人意」、「大家有話,新婦無喙」,既然有緣嫁入去人兜,成做一家人,咱就愛珍惜這種緣份。俗語嘛有另外一句:「一人看出一家,新婦看出大家」,就是講新婦的所作所為,佮大家嘛有誠大的關係。做大家的人較有經驗,愛共鋩角教予新婦知,

邀訪來賓:無

錢,儉愛儉,嘛袂使儉過頭,像講:「一个錢拍二十四个結」,就是咧笑遐凍霜的人。古早時代,十二月天足寒,閣會落雪。你若走去厝頂睏,一定會去予霜凍著,閣會予你寒甲咇咇掣,毋才會講「十二月天睏厝--凍霜」。用天氣狀況的話語來形容『小氣鬼』,嘛真趣味。凍霜顧人怨,傷儉,凡勢人會笑你「虯閣儉,枵鬼兼雜唸」。

邀訪來賓:無

好田地不如好子弟」、「也著箠,也著糜」,叫阮老爸毋若愛疼我,更加愛教示我,囡仔做毋著代誌,一定愛講予伊知影佗位做毋著,而且一定愛共歹習慣改掉,按呢後擺才袂匪類 拍囝拍心肝,氣囝氣無影」就是『打在兒身,疼在娘心』。其實咱講遮濟,重點就是欲強調「倖豬夯灶,倖囝不孝」的道理,囡仔傷過寵倖,就會有無好的結果。

邀訪來賓:無

「仙人拍鼓有時錯,跤步踏差啥人無」,你看連神仙嘛會脫箠,拍鼓遮簡單的代誌有時嘛會拍毋著去,何況咱遮的普通人咧?可見講毋著話、做毋著代誌,是誠四常的代誌。其實閣有另外一个層次,就是教咱面對別人錯誤的時,咱愛會曉理解、諒解對方,毋通看人做毋著,就欲共人笑、欲佮人冤家,甚至發生衝突,我相信絕對毋是刁意故欲共代誌舞害去,可能是身體無爽快,抑是厝裡出代誌,才會一時失覺察,做毋著代誌。這个時陣,好好仔佮對方討論,揣出解決問題的鋩角,才是咱愛去做的工課。

邀訪來賓:無

只要有塗的所在,你攏看會著有草仔發出來,閣會當佇彼个所在生存落去。毋管生存環境偌艱難、偌焦燥、地勢有偌懸,逐工透早,無論你大細懸低、佇佗位,每一枝草仔頂頭攏會有露水。毋若按呢,風若吹,每一枝草仔攏會做伙搖來搖去,可見天公伯仔對攏是公平對待。所以若有人為著生活、為著感情,抑是職業拄著無順利、鬱卒、操煩的代誌,甚至是想袂開的時,我攏會共講:「一枝草,一點露」,只要你拍拚,一定有機會來改變目前的狀況。

邀訪來賓:無

「手抱孩兒,才知爸母時」,是講等到咱做人爸母的時,就會知影當初時爸母晟囡仔的艱苦。當我想欲歇睏的時,紅嬰仔顛倒精神足好,攏會倚過來欲揣我,雖然伊猶袂曉講話,毋過喑喑唔唔,嘛是一直臚,真正是「一个囡仔,較鬧熱三个大人」。甚至半暝仔腹肚枵,毋管大人敢有咧睏,伊就嘛嘛吼,橫直伊就是欲食奶,害我就愛緊起來泡牛奶予伊啉,若飼若盹龜,這馬想起來實在真好笑。

邀訪來賓:無

「一人煩惱一樣,無人煩惱親像」,逐个人攏有無仝的煩惱,敢若華語所講的:『家家有本難念的經』。不而過,論真共想想咧,憂頭結面是一工,歡頭洗面嘛是一工,佇遐煩惱東、煩惱西,不如就盡咱的本分,先共眼前的工課做予好。做學生的就好好仔讀冊,充實家己的智識佮能力;做家長的就共厝內的代誌發落好勢,共囡仔顧予好;食頭路的人,就共頭家交代的工課做予著、做予好、做予媠,按呢較規氣啦。「一人主張,毋值兩人思量」、「濟人濟跤手,加人加福氣」,凡勢咱無法度的所在,別人就有誠好的處理方式。

邀訪來賓:無

「徛懸山,看馬相踢」抑是「上山,看馬相踢」、「上懸樓,看馬相踢」,遮的俗語所欲教示咱的道理,就是講別人咧冤家的時,咱就徛較邊仔咧,毋通徛傷倚,按呢較袂出代誌。就親像兩隻馬咧相觸,咱若倚傷近,可能會去予馬踢著。這種狀況,佮另外一句俗語:「看人食肉,毋通看人相拍」所講的道理仝款,人咧相拍的時,咱毋通蹛邊仔看,萬不二夆拍著,毋就加衰的。阿如,世間事誠僫得兩全其美,抑就是「有一好,無兩好」。「一人一家代,公媽隨人祀」是教咱毋通傷過家婆,才袂「公親變事主,好心予雷唚」。毋過若逐家攏自私自利,咱的社會就會變甲誠無趣味。

邀訪來賓:無

「食飯皇帝大」、「先顧腹肚,才顧佛祖」,既然按呢,咱今仔日就先介紹一寡佮「食」有關的俗語。有的少年人靠勢身體勇,對食、睏攏無注重,其實以早咱祖先就共咱講:「趕人生,趕人死,趕人食飯無情理」,意思是講食飯是足重要的代誌,就算按怎趕緊,嘛袂當佇食飯的時陣來亂。另外,俗語講:「早頓食飽,中晝頓食巧,暗頓半枵飽」,這就是食物件的學問。透早起來誠需要補充營養,而且下早七點到九點是胃消化上好的時陣,莫怪祖先教咱早頓著愛食予飽,作穡做到中晝,咱嘛愛共補充寡,毋過,嘛袂當食傷濟,「貪食無補,落屎艱苦」,所以中晝頓食巧無咧食飽。到暗時仔下班,更加毋通食傷濟,予咱的胃腸會當好好仔歇睏,遮就是暗頓半枵飽的道理。